“АЛТАНБУЛАГ” ЧӨЛӨӨТ БҮСИЙН ЗАХИРАГЧИЙН МЭНДЧИЛГЭЭ

 

 


 

 

ТА БҮХНИЙ АМАР АМГАЛАНГ АЙЛТГАН МЭНДЧИЛЖ БАЙНА.

 

“Алтанбулаг” чөлөөт бүсийн хөгжлийн төлөө хамтран ажиллаж буй гадаад, дотоодын хөрөнгө оруулагчид болон тусгай дэглэмийг хэрэгжүүлэгч төрийн байгууллагуудын төлөөлөл Эрхэм та бүхэндээ талархал илэрхийлье. 

Монгол Улсын Засгийн газрын 153 дугаар тогтоолоор 2014 оноос эхлэн байнгын дэглэмд шилжин ажилласнаар өдгөө хөрөнгө оруулагчдын үйл ажиллагааны болон хөрөнгө оруулалтын цар хүрээ тэлж, зорчигчдын хөдөлгөөн өдрөөс өдөрт өсөн нэмэгдсээр байна. “Алтанбулаг” чөлөөт бүс нь Ази Европийг холбосон стратегийн ач холбогдол бүхий байршилд оршдог бөгөөд алдарт “Цайны зам”-аас түүхэн улбаатай.  

Эдийн засгийн коридор байгуулах буюу бүс нутгийн хамтын ажиллагааг эхлүүлэх хамгийн том илрэл нь Алтанбулаг чөлөөт бүс юм. Чөлөөт бүс хөгжсөнөөр Монгол, Орос, Хятад улсын хооронд хэрэгжиж байгаа худалдаа эдийн засгийн хамтын ажиллагаа, аялал жуулчлал, тээвэр логистик зэрэг бүх чиглэлийн харилцаа хөгжих боломжбүрдэж,  Ази-Европийг холбосон хамгийн том хуурай газрын логистикийн төв, олон улсын хуурай боомт (Dry Port) болгох нөхцөл бүрдэж байна. 

Чөлөөт бүсийн тухай хуульд заасны дагуу “Засгийн газар хоорондын гэрээ, хэлэлцээрийн дагуу хил залгаа улстай эдийн засгийн хамтын ажиллагааны бүс байгуулж” болно гэж заасны дагуу ОХУ-тай эдийн засгийн хамтын ажиллагааны бүс байгуулах талаар эрчимтэй яриа хэлэлцээр хийж байна.

 “Алтанбулаг” чөлөөт бүсийг эрчимжүүлэх ажлын хүрээнд хууль журмуудын зохицуулалт, төр хувийн хэвшлийн уялдаа холбоог сайжруулах чиглэлээр арга хэмжээг авч хэрэгжүүлж байна.

Өнөөгийн байдлаар чөлөөт бүсэд дэлхийн 19 улсаас Хүнсний бараа, техник, тоног төхөөрөмж, гэр ахуйн болон гоо сайхан, спорт бараа болон бэлэн хувцас  гэх мэт давхардсан тоогоор 200 гаруй нэр төрлийн бараа бүтээгдэхүүн импортлож байгаа бөгөөд  чөлөөт бүсийн зорчигч тээвэр, бараа эргэлтийн статистик тоон үзүүлэлт жилээс жилд өсөн нэмэгдэж байна. 

 “Алтанбулаг” чөлөөт бүсийн үндсэн дэд бүтцийг бий болгож үйлдвэрлэлийг хөгжүүлснээр бүс нутаг төдийгүй Монгол улсын нийгэм, эдийн засгийн хөгжилд бодит үр ашгаа өгнө гэдэгт итгэл төгс байна. Чөлөөт бүсээ олон улсын жишигт хүргэх их үйл хэрэгт хамтран зүтгэхийг Та бүхэнд уриалж байна.   

                                  

                                                                                                                         “АЛТАНБУЛАГ” ЧӨЛӨӨТ БҮСИЙН ЗАХИРАГЧ  Г.ГАНЗОРИГ